L' IMPIEGATUTenimu 'ntra all'Italia l'impiegati,
ddha gente sempre china te allegria, tenimu 'ntra 'll'uffici sfaticati; 'sta pinna comu ha fare cu li scria ? Te fannu la presenza ogne matina a retu lli sportelli, carte e carte ..... ma cu 'na strafuttenza sopraffina, le pigghianu e le mintenu te parte. 'Na fila te cristiani fore spetta, ma ci è ca ni lu tae 'nu chiarimentu ? Pueru 'mpiegatu...legge la gazzetta , e tutti manda, addhai , beddhu cuntentu. Quandu poi, lu giurnale s'ha spurpatu, se uarda l'orologiu : " Che ora è ? " Se 'ntisa te ddha seggia 'ncaddhisciatu, e cu se svaria pigghia nu cafè. Passata c'ae già metà sciurnata, telefuna cu saccia ce ha mangiare; se face cu l'amicu 'na parlata su quistu e quiddhu , ncigna lu tagghiare.... Lu giurnu cussì passa , nah fatia ! te l'impiegatu vero tiscraziatu; nu se ppulizza mancu scrivania e bae tecendu : " Quantu haggiu fatiatu ! " E a fine mese face lu scuntentu : " Mannaggia haggiu pigghiata 'na miseria " se ssetta e penza . Uarda ce mumentu : cu campi osce è 'na cosa seria. Ci uei cu fazzu chianu l'inventariu te tutte ddhe cartacce da archiviare, tocca me paghi lu straordinariu, senò, governu latru, stau a russare . |
CELUSIAFra tante malatie ca manda Cristu,
la pesciu tene la mugghere mia. Ulia cu sacciu prpriu ce ha sciù bistu, s'à malazzata te ddha celusia... Matina e sira sempre me tortura, me secuta te scusu, te luntanu, controlla li menuti , la menz'ura, ieu pè dispettu tornu a casa chianu. La sira , quandu sennu haggiu zzeccatu, se ntisa te lu liettu sota sota, e citta cu lu paasu sou felpatu, e giacca e portafogli me rreota. La parte fazzu sempre te lu fessa, nu badu a tutta quista fissazione.... E quandu nu se sente iddha cu bessa, me face secutà te lu vagnone. Nu giurnu me ba trou pè congettura, cu la mugghre te 'nu caru amicu, parlammu a centru stata 'na mezz'ura, ma quiddhu ca successe, mò bu ticu. Turnatu a casa dopu 'na sciurnata ca sacciu solo ieu quantu fatiai, muggherema chiangendu : " 'Na nammurata t'à cchiata ? Osce è megghiu cu te ndiai" "Mò basta !... " tisi e cuminciai a retare. "Mò puru 'na nammurta m'haggiu cchiata ? Se a retu, beddha, me putia turnare, nu me spusà te certu n'autra fiata " |